சின்மய சூர்யாவில் சின்மய ஜெயந்தி விழா (08.05.2012)

    அன்பின் வெளிப்பாடு சேவையாகும். இந்த வாக்கியத்திற்கு சிறந்த எடுத்துக்காட்டாய் விளங்கியவர் பூஜ்ய ஸ்வாமி சின்மயானந்தர். அன்பெனும் அழகான அஸ்திரமெடுத்து மனித இனம், நமது சமூகம் மற்றும்  கலாச்சாரம் ஆகியவைகள் அறவழியில் ஆன்மிகப்பாதையில் தழைத்து ஆரோக்கியமாய் வளர தனது வாழ்நாள் முழுவதையும் அர்ப்பணித்தவர். அப்பேற்பட்ட மகானின் ஜென்ம தினமான மே-8 தினத்தை, உலகமெங்கும் சின்மய பக்தர்கள் அந்நாளை ‘சேவை தினம்’ என கருதி விமரிசையாக கொண்டாடி வருகிறார்கள்.

இதனையொட்டி, சின்மயா மிஷன், புதுச்சேரியும் அந்நாளை சிறப்பாய் கொண்டாட திட்டமிட்டுள்ளது. 06.05.2012 (ஞாயிறு) அன்று ரத்த தானம் முகாம் ஒன்று 108, கிருஷ்ணா நகர் மெயின் ரோடு, 17வது குறுக்கு, புதுச்சேரி -8 என்ற விலாசத்தில் அமைந்த சின்மய சூர்யாவில் காலை 9.30 முதல் 12.30 மணி வரை நடந்தது. இந்த உன்னதப் பணியில் 70 நபர்கள் கலந்துகொண்டு ரத்த தானம் அளித்தனர்.

      மேலும், 8.5.2012 (செவ்வாய் கிழமை) அன்று பகல் 1 மணியளவில் ப்ரஹ்மசாரிணி ஸ்ருதி சைதன்யா, ப்ரஹ்மசாரிணி சாந்தி, திரு. நடராஜன், திரு பாஸ்கரன், அவர்களது முன்னிலையில் ஜிப்மர் வளாகத்தில் சுமார் 500 பேருக்கு அன்னதானம் வழங்கப்பட்டது.

மேலும், மாலை 6.30 மணியளவில் சின்மய சூர்யாவில் பாதுகா பூஜை, மற்றும் சத்தங்கம் நடந்தது. இதில் பக்தர்கள் பலர் கலந்துகொண்டு குருதேவரின் ஆசி பெற்றனர்.